Ab tak bohot kuchh khoya hai, paaya hai
Samay ne apne hisaab se chalaya hai
Khoob jiya saath sabke aur akele bhi
Dekhi khushiyaan rishton ki aur jhamele bhi
Kayi baar khud hi khud ko aazmaaya
Bohot kuchh zindagi ne bhi sikhaya
Fir ek saal beet gaya zindagi ki udherbun mein
Haste gaate apni purani tarannum mein
Magar iss saal ek nayi dhun se mulaaqaat hui
Naye suron se haseen din raat hui
Dekhein tanhaayi ki aadatein kab chhut paati hai
Nayi zindagi kya naye rang dikhlaati hai
Kisko pataa aage kya hoga kiska haal
Bass beet jaaye kisi tarah ye aur saal
Suna hai agle baras kuchh aur baat hogi
Suna hai agle baras wo bhi saath hogi…
Khushk ankhon mein bheegi huyi chamak chhor jaati hai…
Wo jab milti hai mere haathon mein mehek chhor jaati hai …
Kyon na dekha karein hum jaag ke chaand ko raat bhar..
Wo sawarti hai to chand pe apni jhalak chhor jaati hai…
Kabhi bujhaati hai nazar se chashm-e-dil ki pyaas…
Kabhi labon pe aag ki si dhadhak chhor jaati hai…
Humko maloom hai waqt ka faasla humare beech…
Aise bichharti hai ki jaldi milne ki kasak chhod jaati hai…
Nahi kehti hai kya hoga agli mulaqaat ka bahaana…
Jaate jaate fir jhumke ki latak chhod jaati hai…
Aaj fir waada tha milne ka ussi jagah,
Aaj fir wo gulaab zulfon mein piro lena
Aaj fir milne aana chhup chhup ke mujhse
Aaj fir mujhe apni baahon mein dubo lena
Aaj fir chaha tha tumhari shiqayat door karna,
Aaj fir apni chaahat mein tumko bheego lena…
Aaj fir mein bejhijhak tumko dekhta rahun,
Aaj fir tum meri nigaahon mein kho lena…
Aaj fir chalna mere saath sunsaan raaston par
Aaj fir mere kaandhe pe sar rakh ke so lena
Aaj fir socha tha poore karunga kuchh sapne
Aaj fir tumhe khushi ke aansuo mein bhigo dena
Aaj fir mein wada nahi nibha paaya
Aaj fir mujhe kos ke thoda ro lena…
Aaj teri yaadon ko apne maazee se rihaai de di…
Arse se sambhale dard ko seene se judaai de di
Parwanon ko to aag mein bhi husn nazar aata hai
Butparaston ne qatl karne walon ko maseehai de di
Butparast — idol worshipper
Banaane wale ne diya hai sabke liye kuchh na kuchh
Faqt shayaron ke liye tere gusse ko raanaee de di
raanaee — beauty
Chahane walon ko hi to milti hai har baat pe sazaa
Husn walon ko to khuda ne khud begunahee de di
Kis kis se jirah karun mein apne wajood ka
Mere siwa har kisi ko khoob daanaee de di
daanaaee — wisdom
Chal banaate hain basera kisi saabit jagah par…
Samandar ke sarakte kinaron ko bidaaee de di
Jis tarah pahaad se nikali ho sarita
Chahe jitni bhi ho raah ki kathintaa
Chhid gaye pahad gal gayi chattanein
Chal gayi pata rodon ko unnki heenta
Chal pade yuva maano aa gaya tufaan ho
Jis tarah samudra mein aa gaya ufaan ho
Jal rahi hai aag jaise samaj ek mashan ho
Har taraf dhuaan jaise jala vartmaan ho
Poori aazadi ka matlab ab humne jaana
Satya ahinsa ki taaqat ko fir pehchana
Apna dum duniya ko fir se ab hai dikhlana
Jaago bhaarat sapno ko hai satya banaana
Theek se bhigaati bhi nahi aur jalne bhi nahi deti
Zulf ko yun jhatka na karo mere saamne…
Dhadkan thaamti bhi hai aur rukne bhi nahi deti
Parda rafta rafta na karo mere saamne…
Mayekashi chhodi hai par jaam ki izzat bhi hai
Pyaale aankhon ke chhalkaya na karo mere saamne
Ishq bhi hai aur tere aashiqon ka khayal bhi hai
Yun sajde kiya na karo mere saamne
Ghuroor hai to ghuroor kayam rakkho
Beparda khwaab mein aaya na karo mere saamne
Dil tadapta bhi hai aur ye tadapne bhi nahi deti
Aaj mujhko hi qatl karo mere saamne…
Chaand pe langar daal ke teri chhat pe aaya hota
Jo ghar apna is kadar door na basaaya hota
Chittiyaan likh kar kabootar se bhijwaya hota
Jo kismet ki girri mein dhaga kamm na paaya hota
Ban ke baadal tujhe ji bhar bhigaya hota
Jo hawa na chalti to tere ghar pe chhaya hota
Wo seep beh ke tere kadamo tak aaya hota
Waqt ne moti gar mere seene mein chhupaya hota
Meri dhadkanon mein apni aahat ko paya hota
Kuchh der aur jo mujhe seene se lagaya hota
— An english translation for My friend John from Spain
I’d have put anchors on the moon and jumped to your roof
Had our houses been not so far apart
I’d have pigeons carry my love letters to you
But the thread of fate fell short
I’d have been the cloud and drenched you full
Had the winds allowed me to show my art
I’d been the shell and come floating to your feet
Had i been carrying a pearl covert
You’d have heard your heartbeats in mine
Had our meeting not been so short…
Yaar kuchh aisa kaho aaj ki baat kuchh baaki na rahe
Na muskaan koi reh jaaye aur koi aansoo baaki na rahe
Kal ye na ho kuchh reha jaaye kehna sunna
Tez chalti hai, kal kya pata, saans kuchh baaki na rahe
Keh do kuchh nayi puraani kachchi pakki baat
Dil se nikali dimaag mein ulajhtii baat
Baat phoolon ki aur mausam ki ya duniyadaari ki
Rangon mein lipti sapno mein mitati baat
Baat jab maikade mein chhide to koi saaqi na rahe
Koi ghalib na rahe, koi faraaz koi meer taaqi na rahe
Baat toofaan ho aur charagon ko bhi jalaaye rakkhe
Aazaad kar do sab alfaas saath kuchh baaki na rahe…
Yaar kuchh aisa kaho aaj ki baat kuchh baaki na rahe…
There are days and sun is bright…
And we look for stars in a gloomy night…
It is huge difference between the two…
But stars are suns much farther than you…
When it is most difficult to cope…
It is more important to hope…
And hold on to a dimming ray…
Because nights are darkest just before the day…
Saath hain par jazbaat mein wo baat nahi aati,
Roz-o-shab guzarte hain par wo raat nahi aati…
Itna mushkil bhi nahi khuda se betaqalluf rehna,
Jaane kyun har bashar mein wo bisaat nahi aati… *bashar = human
Garche wo sunta hai har mazloom ki fariyaad
Fir kisi ke maang lene se kyun wafaat nahi aati… *wafaat = death
Har kisi ko milti nahi jaaedaad-e-mohabbat,
Faqt jaagir ke mil jaane se ifraat nahi aati… *ifraat = excess
Khud hi taabeer karne padte hain kuchh khwaab,
Har chahat ko poora karne kaayenat nahi aati…
Ab to mere haal pe hasne lage rote bachhe bhi,
Aur wo kehte rahe ujjwal ko khurafaat nahi aati…
